Presidentja Vjosa Osmani: Nuk shpërtheva ndaj Borellit, ishte reagim parimor meqë u shpreh i njëanshëm

Presidentja Vjosa Osmani: Nuk shpërtheva ndaj Borellit, ishte reagim parimor meqë u shpreh i njëanshëm

Presidentja e Kosovës, Vjosa Osmani ka folur për reagimin që ka pasur ndaj përfaqësuesit të lartë të BE-së, Josep Borrell.

Osmani ka deklaruar më herët se Borrell është i njëanshëm dhe nuk e ka menaxhuar si duhet dialogun.

“Nuk ishte shpërthim, ishte reagim parimor sepse në çdo proces dialogu ndërmjetësuesi duhet të jetë i paanshëm. Ajo që pamë atë ditë ishte anshmëri e shprehur shumë qartë nga ana e zotit Borrell ku fajësohej Kosova për dështimin e një procesi ku më së paku kishte faj Kosova,” tha ajo në Euronews Albania.

Osmani shtoi se propozimi për targat i vënë në tavolinë nga ana e Bashkimit Europian fillimisht ishte refuzuar nga ana e Serbisë. Më pas në tekst, siç tha Osmani ishin larguar pjesët më esenciale të tij.

“Ishte larguar pjesa që kishte të bënte me kornizën e marrëveshjes finale dhe e dyta ishte larguar dhe afati kohor, prandaj dhe ne kur u dakorduam me Shtetet e Bashkuara të Amerikës që të kemi këtë 48-orëshin shtesë insistuam pikërisht në këto dy çështje,” u shpreh Osmani.